2.6k
Shares
काठमाडौं । जनता समाजवादी पार्टी, नेपाल (जसपा) ले पार्टीको नीति, निर्णय र अनुशासन विपरीत गतिविधिमा संलग्न भएको आरोपमा आठ जना नेता–कार्यकर्तालाई पार्टीबाट निष्कासन गरेको छ। आसन्न प्रतिनिधिसभा निर्वाचन–२०८२ लाई लक्षित गर्दै पार्टीले संगठनात्मक अनुशासन कडा बनाउने संकेतस्वरूप यो निर्णय गरेको हो।
ललितपुरस्थित केन्द्रीय कार्यालयबाट जारी प्रेस विज्ञप्तिमा पार्टीको आधिकारिक उम्मेदवारविरुद्ध बगावत गर्ने, पार्टी हितविपरीत उम्मेदवारी दिने तथा पार्टी निर्णयलाई खुला रूपमा चुनौती दिने व्यक्तिहरूलाई आजको मितिदेखि लागू हुने गरी निष्कासन गरिएको उल्लेख छ।
निष्कासित हुनेमा पर्सा, बारा, सर्लाही र महोत्तरी जिल्लाका प्रभावशाली स्थानीय नेता समावेश छन्। पार्टी कारबाहीमा पर्नेहरूमा पर्साबाट प्रदीप यादव, बाराबाट चन्दन कुमार सिंह, आत्माराम साह, कमरुल्लाह अन्सारी र नवल किशोर सिंह, सर्लाहीबाट उदयकान्त मिश्र तथा महोत्तरीबाट हरिनारायण यादव र डा. शिवजी यादव रहेका छन्।
जसपाले पार्टी विधान र संगठनात्मक मर्यादामाथि सम्झौता नगर्ने स्पष्ट सन्देश दिएको छ। “पार्टी अनुशासनमाथि प्रश्न उठाउने जो–कोहीलाई कारबाहीको दायरामा ल्याइनेछ,” विज्ञप्तिमा उल्लेख छ। यस निर्णयलाई पार्टी नेतृत्वको शक्ति प्रदर्शन र आन्तरिक विद्रोहमाथिको निर्णायक प्रहारका रूपमा हेरिएको छ।
राजनीतिक विश्लेषकहरूका अनुसार, यो कदमले जसपाभित्र लामो समयदेखि देखिँदै आएको असन्तुष्टि र गुटगत गतिविधिमाथि कडा लगाम लगाउने संकेत गरेको छ। निर्वाचन नजिकिँदै गर्दा पार्टी नेतृत्वले ‘लाइन बाहिर जाने’ कुनै पनि गतिविधि सहन नसक्ने स्पष्ट सन्देश दिन खोजेको बुझाइ छ।
पार्टी अध्यक्ष उपेन्द्र यादव र संरक्षक महन्थ ठाकुर हस्ताक्षरसहित जारी विज्ञप्तिले आगामी दिनमा अझ कडा संगठनात्मक कारबाहीहरू देखिन सक्ने संकेत पनि दिएको छ। जसपाले निर्वाचनमा पार्टी हितभन्दा माथि व्यक्तिगत स्वार्थ राख्ने प्रवृत्तिलाई पूर्ण रूपमा अस्वीकार गर्ने अडान दोहोर्याएको छ।