हरिनगरामा तेस्रो राधाकृष्ण रथ यात्राको सम्पूर्ण तयारी पूरा

सुनसरी। कृष्ण जन्माष्टमीको पावन अवसरमा आगामी भदौ १ गते हुने तेस्रो राधाकृष्ण रथ यात्राको सम्पूर्ण तयारी पूरा भएको छ। रथ यात्रा व्यवस्थापन समितिका अध्यक्ष मनोेज राउतका अनुसार यस वर्षको रथ यात्रा विगतका तुलनामा अझ भव्य र भक्ति–भावनाले परिपूर्ण हुने भएको छ।

आयोजकका अनुसार रथ यात्रामा विभिन्न झाँकी प्रदर्शन, भजन–कीर्तन, नृत्य, र भक्तिमय सांस्कृतिक कार्यक्रमहरू हुनेछन्। रथ यात्रा हरिनगर गाउँपालिका–४, हरिनगरा बजारस्थित राधाकृष्ण मन्दिरबाट सुरु भई सम्पूर्ण बजार परिक्रमा गर्नेछ। यात्रा सांझको विशेष आरतीका साथ सम्पन्न हुनेछ।

यस वर्षको रथ यात्रा श्री राधाकृष्ण यात्रा महोत्सव २०८२ अन्तर्गत आयोजना गरिएको हो। मुख्य रथ भदौ १ गते दिउँसो २:०० बजे मन्दिर प्राङ्गणबाट प्रस्थान गर्नेछ। आयोजक रथ यात्रा महोत्सव मेला समारोह समितिका अनुसार कार्यक्रमलाई सुचारु र सुरक्षित रूपमा सम्पन्न गर्न आवश्यक सबै व्यवस्था मिलाइएको छ, जसमा स्वयंसेवक टोली, सुरक्षा व्यवस्था, तथा श्रद्धालुहरूको सुविधा व्यवस्थापन समेत समावेश गरिएको छ।

स्थानीयवासी, भक्तजन तथा आसपासका क्षेत्रका श्रद्धालुहरूलाई भव्य र भक्तिमय रथ यात्रामा सहभागी भई पुण्य लाभ लिन आयोजक समितिले हार्दिक निमन्त्रण गरेको छ।