‘सुशासन’ मेरो पहिलो प्राथमिकताः स्वतन्त्र उम्मेदवार थापा

काठमाडौं। संघीय राजधानी नजिकै भए पनि विकासमा पछाडि परेको काभ्रेपलाञ्चोकलाई अघि बढाउने प्रतिबद्धतासहित भुम्लु गाउँपालिका–२, सिम्थलीका ३० वर्षीय पत्रकार उमेश थापा प्रतिनिधिसभा निर्वाचन क्षेत्र नम्बर २ बाट स्वतन्त्र उम्मेदवार बनेका छन्।

‘ठेकी’ चुनाव चिन्ह लिएर मैदानमा उत्रिएका थापाले विगतका जनप्रतिनिधिले जनअपेक्षा अनुसार काम नगर्दा जिल्ला शिक्षा, स्वास्थ्य, रोजगारी र पर्यटनजस्ता क्षेत्रमा पछाडि परेको बताएका छन्।

लामो समयदेखि पत्रकारितामार्फत बेथिति र भ्रष्टाचारविरुद्ध आवाज उठाउँदै आएका थापाले अब स्वयं नेतृत्वमा पुगेर सुधार गर्ने उद्देश्यले उम्मेदवारी दिएको बताए। उनका अनुसार देश निर्माणको प्रमुख आधार सुशासन र इमान्दार नेतृत्व हो। भदौ २३ र २४ गते भएको आन्दोलनको उल्लेख गर्दै उनले सुशासन कायम गर्नु आफ्नो पहिलो प्राथमिकता रहेको स्पष्ट पारे।

घरदैलो अभियानमा व्यस्त थापा मत माग्नुभन्दा पनि मतदाताका समस्या र सुझाव सुन्न केन्द्रित छन्। चुनाव जितेपछि महिनैपिच्छे सार्वजनिक सुनुवाइ गर्ने, जनताको घरदैलोमै पुगेर समस्या समाधानमा लाग्ने र पारदर्शी ढंगले काम गर्ने उनको प्रतिबद्धता छ। सरकारले सदनमा उठाएका विषयको सुनुवाइ नगरे जनतासहित सडकमा उत्रिने चेतावनीसमेत उनले दिएका छन्।

स्थानीय उत्पादनको बजारीकरण, पर्यटन प्रवर्द्धन, औद्योगिकीकरण र काभ्रेमै रोजगारी सिर्जना आफ्नो प्रमुख एजेण्डा भएको थापाको भनाइ छ।

वैदेशिक रोजगारीलाई बाध्यता नभई विकल्प बनाउने र जिल्लामै गुणस्तरीय शिक्षा–स्वास्थ्यको व्यवस्था मिलाउने उनको योजना छ। आफूलाई मतदान गर्नु भनेको जनता स्वयं जित्नु भएको उनले दाबी गरेका छन्।