शिक्षामन्त्री डा. महावीर पुनले देशको समृद्धिको नेतृत्व अब युवापुस्ताले गर्नुपर्ने बताएका छन्।
७१ वर्षीय मन्त्री पुनले शुक्रबार सिंहदरबारस्थित कार्यकक्षमा पत्रकारहरूसँगको कुराकानीका क्रममा
भावनात्मक अभिव्यक्ति दिँदै भने, “भगवान् कसम, यो ‘बुढोपुस्ता’ले देश समृद्ध बनाउनै सक्दैन,
अबको सरकार र निर्णय जेन–जी पुस्ताको हातमा हुनुपर्छ।”
उनले लामो समयदेखि देशका प्रमुख निर्णयहरू उमेरदराज नेताहरूले आफ्नो स्वार्थका लागि लिँदै आएको आरोप लगाउँदै भने, “हामीले वर्षौंसम्म देशको सपना पुरानो सोचले थाम्यौं, तर अब देशलाई नयाँ पुस्ताको दृष्टि चाहिन्छ।
अब टेक्नोलोजी, इन्नोभेशन र ऊर्जा भएका युवाहरूले नेतृत्व गर्नुपर्छ।”
डा. पुनले जेन–जी पुस्ताको ऊर्जा र नवप्रवर्तन क्षमतालाई सरकारी नीति निर्माणमा प्रयोग गर्नुपर्नेमा जोड दिए। “देशलाई पुरानो ढर्रामा हिँडाएर होइन, डिजिटल युगमा अघि बढाएर मात्र समृद्ध बनाइन्छ,” उनले भने, “अब नीति र कार्यान्वयनमा २५ देखि ४० वर्षसम्मका युवाहरूलाई जिम्मेवारी दिनुपर्छ।”
पूर्व शिक्षाविद् तथा आविष्कारकका रूपमा चर्चित डा. पुनले आफू मन्त्री भए पनि नयाँ पुस्ताको आवाज सुन्ने र उनीहरूका सुझावलाई प्राथमिकतामा राख्ने प्रतिबद्धता जनाए। उनले मन्त्रालयमा “युवा सल्लाहकार समूह” गठन गर्ने तयारी भइरहेको पनि जानकारी दिए।
उनका अभिव्यक्तिले देशभर चर्चा पाएको छ।
सामाजिक सञ्जालमा कतिपयले पुनको भनाइलाई “साहसी सत्य” भनेका छन् भने कतिपयले यसलाई “राजनीतिक असन्तुलन ल्याउने वक्तव्य” भन्दै आलोचना पनि गरेका छन्।
तर डा. पुन भने आफ्नो भनाइमा दृढ छन्। उनले भने, “म अरूजस्तै राजनीतिको लागि मन्त्री भएको होइन, परिवर्तनको लागि आएको हुँ। यदि हामीले अब पनि पुस्ता परिवर्तन नगरे, समृद्धिको सपना सपना नै रहन्छ।”