दोलखामा बोत्ले स्मृति दिवस: शहीद र घाइते परिवारको सम्मान, नेतामाथि वर्गीय विभेदको आरोप

नेकपा माओवादी केन्द्र दोलखाले २०५९ साउन १८ गते बोत्लेमा राज्यपक्षद्वारा मारिएका १४ जना शहीदको स्मृतिमा स्मृति दिवस मनाउँदै शहीद तथा घाइते परिवारलाई सम्मान गरेको छ। पार्टी केन्द्रीय कार्यालय कोटेश्वरमा आयोजित कार्यक्रममा अध्यक्ष पुष्पकमल दाहाल ‘प्रचण्ड’को उपस्थितिमा सम्मान गरिएको हो।

कार्यक्रममा बोल्दै दोलखाका नेता शंकर लामाले नेताका परिवार मारिँदा मात्र स्मृति दिवस मनाउने तर सर्वसाधारण शहीदको बेवास्ता हुने गुनासो गरे। बोत्ले घटनामा आफ्नी पत्नी गुमाएका लामाले रुँदै भने, “शहीद पनि वर्गीय हुन थालेका छन्, टाठाबाठा र नेताका परिवारको स्मृति दिवस मनाइन्छ, तर सामान्य शहीदको कुनै वास्ता छैन।” उनले देशभरका शहीदहरुको अभिलेख तयार गर्न आग्रह गर्दै सबै शहीदको समान सम्मान गर्नुपर्ने धारणा राखे।

उनले पार्टीभित्रको गुटबन्दीले शहीद परिवार, कार्यकर्ता र आम जनता निराश भएको बताए। अहिले पार्टीलाई केन्द्रीकृत बनाउँदै सशक्त नेतृत्व आवश्यक रहेको उनको भनाइ थियो। साथसाथै, लामाले नेताहरुलाई पदको लोभी नहुन र कमिटी चुस्त बनाउन सुझाव दिए। “हामीलाई पदलोभी नहुनु भनेर प्रशिक्षण दिने तपाईंहरू नै अहिले पदमा लोभ देखाउँदै हुनुहुन्छ,” भन्दै उनले एकैपटक धेरै उपाध्यक्ष, महासचिव राखिएकोप्रति आलोचना गरे।

कार्यक्रममा अध्यक्ष प्रचण्डले बोत्ले शहीद परिवार र घाइतेहरूलाई सम्मान गर्दै जनयुद्धकालका पीडालाई स्मरण गर्नुपर्ने बताए। उनले स्मरण गराए कि, बोत्लेमा माओवादी कार्यकर्ताहरुलाई रातको समयमा सुतिरहेको अवस्थामा घेरेर मारिएको थियो, जुन घटनाले जनयुद्धको पीडादायी पक्ष उजागर गर्छ।

यो कार्यक्रमले माओवादी आन्दोलनका शहीदहरूको सम्मान मात्र होइन, पार्टीभित्रको असन्तुष्टि र वर्गीय विभेदको सवाललाई पनि तीव्र रूपमा सतहमा ल्याएको छ।