सत्ता घटक दल कांग्रेस–एमालेबीच बालुवाटारमा बैठक, मन्त्री हेरफेर मुख्य एजेन्डा

सत्ता गठबन्धनका प्रमुख दुई दल नेपाली कांग्रेस र नेकपा एमालेका शीर्ष नेताहरूबीच प्रधानमन्त्री निवास बालुवाटारमा बैठक जारी छ। प्रधानमन्त्रीको सचिवालयका अनुसार छलफल आज बिहानदेखि सुरु भएको हो।

बैठकको मुख्य एजेन्डा सरकारमा मन्त्रीहरूको हेरफेर रहेको बताइएको छ। प्रधानमन्त्री तथा एमाले अध्यक्ष केपी शर्मा ओलीले आफ्नै पार्टीका केही मन्त्रीसहित कांग्रेस र लोसपाका मन्त्रीहरू पनि फेरबदल गर्ने तयारी गरिरहेका बेला यस्तो छलफल भएको हो।

उच्च स्रोतका अनुसार प्रधानमन्त्री ओलीले नेपाली कांग्रेसका सभापति शेरबहादुर देउवासँग भेटमा पार्टीको केन्द्रीय निर्णयमाथि पुनर्विचार गर्न आग्रह गर्दै सरकारको कार्यक्षमता बढाउन सहयोग माग्ने छन्।

बैठकबाट मन्त्रिपरिषदमा नयाँ संरचना र कार्यदक्षता सुधारका विषयमा सहमति बन्ने अपेक्षा गरिएको छ।