"राप्रपा नेताहरूको हिरासत अवस्था अमानवीय": मानवअधिकारकर्मी चरण प्रसाईंको आक्रोश

राष्ट्रिय मानवअधिकार आयोगका पूर्वसदस्य तथा प्रख्यात मानवअधिकारकर्मी चरण प्रसाईंले राष्ट्रिय प्रजातन्त्र पार्टी (राप्रपा) का शीर्ष नेताहरू रविन्द्र मिश्र र धवलशमशेर राणालाई प्रहरी हिरासतमा अमानवीय र अपमानजनक तरिकाले राखिएको भन्दै गम्भीर चिन्ता व्यक्त गरेका छन्।

शुक्रबार काठमाडौं जिल्ला प्रहरी परिसरमा नेताद्वयसँग भेटघाट गरेपछि प्रसाईंले सामाजिक सञ्जालमा लेखेका छन् कि यस घटनाले उनलाई "हामी गणतान्त्रिक व्यवस्थामा छैनौं" भन्ने अनुभूति दिलाएको छ।

उनले भेटघाट व्यवस्थाको कटु आलोचना गर्दै लेखेका छन् कि फलामे बारको वारिपारि कुराकानी गर्नुपर्ने अवस्था र हिरासतभित्र मानवअधिकारप्रति देखाइएको अपमानजनक दृष्टिकोणले आफूलाई अत्यन्त पीडित बनाएको छ।

प्रसाईंले थप उल्लेख गरेका छन् कि शान्तिपूर्ण प्रदर्शनलाई राजद्रोहको आरोप लगाइनु र निष्पक्ष न्यायिक छानबिनलाई बेवास्ता गरिनुले नेपालमा गणतन्त्रको वास्तविक अभ्यास नभएको प्रमाणित गर्दछ।

"हिजो शुक्रबार चैत्र २२ गते राप्रपाका नेता धवल शम्शेर राणा र रविन्द्र मिश्रलाई काठमाडौँ जिल्ला प्रहरी परिसरमा भेट्दा लाग्यो हामी गणतन्त्र व्यवस्थामा छैनौं। विगतका निरंकुशता पनि नभोगेको दिन देख्नु पर्यो," प्रसाईंले आफ्नो सामाजिक सञ्जालमा आक्रोशपूर्ण टिप्पणी गरेका छन्।